Op 27 Oktober 1937 is ’n historiese mylpaal bereik toe die Afrikaanse Diens van die SAUK amptelik die lug in is. Vir die eerste keer kon Afrikaners hul eie taal, stories en waardes oor die radio hoor – iets wat die kultuurlandskap vir altyd sou verander.
Voor dié dag was Afrikaans skaars op die lug – net sowat 45 minute per week uit drie klein stasies in Johannesburg, Kaapstad en Durban. Maar met die stigting van die Afrikaanse Diens het die volk skielik ’n eie stem gekry – een wat hul geloof, taal, musiek en leefwêreld weerspieël het.
Reeds ’n jaar later, in 1938, het die Afrikaanse Diens luisteraars diep geraak toe hulle die Simboliese Ossewatrek uitsaai. Duisende Afrikaners het saamgeluister, en vir die eerste keer het die radio as kultuurmiddel die hele volk verbind.
Hoewel die Tweede Wêreldoorlog spanning tussen Afrikaanse luisteraars en die staatsbeheerde radio veroorsaak het, het die Afrikaanse Diens ná die oorlog weer sy ware roeping hervind – om die Afrikaanse gees te voed deur geloof, letterkunde, humor, sport en geskiedenis. Dit het gelei tot die ontstaan van unieke Afrikaanse kunsvorme soos hoorspele en hoorbeelde, en het vertalings van klassieke werke vir ’n nuwe gehoor oopgestel.
By Radio Orania leef daardie nalatenskap voort. Soos die Afrikaanse Diens destyds, wil Radio Orania vandag steeds die stem van die volk wees – gewortel in ons Christelike geloof, kultuur en taal. Elke program wat uitgesaai word, dra dieselfde opdrag: om die Afrikaanse identiteit te koester en uit te bou vir die geslagte wat volg.
📻 Radio Orania – waar die Afrikaanse gees steeds leef en groei.