Die Azanian People’s Organisation (Azapo) doen ’n beroep op kalmte in die boeregemeenskap te midde van die verwoestende uitbreking van bek-en-klouseer in Suid-Afrika.
Dit volg nadat die landbou-organisasie Saai onlangs ’n hofaansoek ingedien het waarin die regering se entstofmaatreëls teen die siekte betwis word.
Volgens Azapo is die hofaksie onnodig en selfgesentreerd, en kan dit die pogings om die siekte te bekamp verder bemoeilik.
Die organisasie het Saai aangemoedig om eerder by die ministeriële taakspan oor bek-en-klouseer aan te sluit. Die taakspan verskaf kundige advies aan die minister van Landbou, John Steenhuisen.
Azapo sê die huidige situasie vereis samewerking tussen alle rolspelers in die landbousektor.
Die organisasie beklemtoon dat dit nou belangrik is dat belanghebbendes saamwerk om die uitbreking te beheer en om stappe te neem om toekomstige uitbrekings van die siekte in die land te voorkom.