Lede van die Ekonomiese Vryheidsvegters meen dat die saak teen hul leier, Julius Malema, polities gemotiveerd is.
Malema verskyn vandag in die Oos-Londense Landdroshof waar die voorvonnisverrigtinge in sy vuurwapensaak plaasvind.
Hy is verlede jaar skuldig bevind nadat hy tydens die EFF se vyfde bestaansjaarviering in 2018 in Mdantsane na bewering ’n vuurwapen afgevuur het.
EFF-ondersteuners het belowe om Malema deurgaans te ondersteun. Hy het intussen aangedui dat hy teen enige vonnis wat die hof oplê, sal appelleer.
Die party glo die saak word gebruik om die EFF te ondermyn en vergelyk dit met die inhegtenisneming van oudpresident Nelson Mandela tydens die apartheidsjare.