Die minister van internasionale betrekkinge en samewerking, Ronald Lamola, het gesê die Amerikaanse ambassadeur in Suid-Afrika, Leo Brent Bozell, moet nie uitsprake maak wat die land verder kan polariseer nie.
Lamola het Woensdagaand met die media gepraat nadat Suid-Afrika die ambassadeur formeel ontbied het oor on-diplomatieke optrede. Dit volg op Bozell se opmerkings tydens ’n nuuskonferensie in Hermanus. Sy kommentaar het gekom te midde van ’n klagte dat Washington “geduld verloor het” met die Suid-Afrikaanse regering omdat dit nie gehoor gee aan Amerikaanse eise oor veranderinge in sy binnelandse en buitelandse beleid nie.
Hierdie eise onder meer in dat Suid-Afrika:
-
afstand doen van Iran,
-
Amerikaanse maatskappye van B-BBEE vrystel,
-
die Onteieningswet wysig om onteiening sonder vergoeding te verbied,
-
landelike veiligheid ’n polisieprioriteit maak, en
-
die sing van “Kill the Boer” veroordeel.
Lamola het bevestig dat Bozell ontbied is omdat hy hom op ’n “baie onaanvaarbare manier” uitgedruk het.
Bozell het later vir dié opmerking om verskoning gevra.
Volgens Lamola moet diplomate Suid-Afrika se soewereiniteit respekteer en nie probeer voorskryf hoe die land sy binnelandse of buitelandse beleid moet bestuur nie. Hy het ook herhaal dat breë-basis swart ekonomiese bemagtiging (B-BBEE) nie, soos soms beweer word, “omgekeerde rassisme” is nie.
Lamola het gesê die Onteieningswet sal volgens die oppergesag van die reg toegepas word en dat onteiening sonder vergoeding slegs as laaste uitweg gebruik sal word.
Hy het ook beklemtoon dat landelike misdaad alle gemeenskappe raak, nie net wit boere nie, en dat die polisie se landelike veiligheidsplan met die Amerikaanse ambassade gedeel is.
Lamola het egter beklemtoon dat Suid-Afrika steeds konstruktiewe betrekkinge met die Verenigde State wil handhaaf.