’n Multidissiplinêre regeringspan is na die Senteekodam buite Barberton in Mpumalanga ontplooi om ’n moontlike noodsituasie te bestuur nadat die damwal ernstig verswak het.
Volgens owerhede het aanhoudende swaar reën die strukturele integriteit van die dam, wat as My Own Dam geregistreer is, aansienlik benadeel. Die departement van water en sanitasie het reeds vroeër gewaarsku dat die dam, wat binne die Kaaprivier-opvangsgebied geleë is, ’n hoë risiko loop om mee te gee.
Gemeenskappe stroomaf is as ’n voorsorgmaatreël aangesê om vloedgevoelige gebiede onmiddellik te ontruim. Ramptoestande is geaktiveer en inwoners is versoek om alle instruksies van plaaslike owerhede en nooddienste streng na te kom. Toegang tot die damterrein is intussen vir die publiek gesluit.
Die ingrypingspan bestaan uit verteenwoordigers van die departement van water en sanitasie, die departement van samewerkende regering en tradisionele sake, asook amptenare van die Mpumalanga provinsiale rampbestuur, die Ehlanzeni-distrik en plaaslike munisipaliteite.
Noodmaatreëls word tans toegepas om druk op die damwal te verlig terwyl tegniese spesialiste deurlopend die omvang van erosie onder die damoppervlak monitor. As deel van dié pogings is die nood-oorloop vir waterafvoer verder uitgebrei om die waterpeil vinniger te laat daal.
Die hoof van die departement se spesialiseenheid vir damveiligheid, Wally Ramokopa, sê ’n bykomende oorloopkanaal is oopgestel en verbreed om te verseker dat water doeltreffend uit die dam afgelei word. Hy beklemtoon dat die stappe tydelik is, maar noodsaaklik om die risiko van ’n moontlike ineenstorting te verminder.
Owerhede het ook ’n gedetailleerde ontleding van die vloedpad gedoen om gebiede te identifiseer wat moontlik geraak kan word indien die dam sou meegee. Volgens die departement word geen digbevolkte gebiede in die pad van moontlike vloei verwag nie, en daar word ook geen impak op Mosambiek of Eswatini voorsien nie.
Besproeiing vir Senteekodam se sitrusboorde is tydelik opgeskort aangesien pompe onder water is. Dit sal hervat word sodra die waterpeil daal en die toerusting herstel is.
Intussen gaan die koördinering van rampgereedheid en moontlike ontruimingsplanne vir boere en inwoners stroomaf voort, terwyl owerhede die situasie fyn dophou.