’n Man van Pietermaritzburg is skuldig bevind aan dieremishandeling nadat 17 pitbulls in onaanvaarbare toestande op sy perseel aangetref is. Die saak het vier jaar geneem om afgehandel te word.
Amod Sheik is op 10 Februarie in die plaaslike landdroshof skuldig bevind kragtens die Wet op Dierebeskerming. Die ondersoek het reeds in 2022 begin toe die Nasionale Dierebeskermingsvereniging (NDBV) ’n anonieme klagte ontvang het oor honde wat glo onder swak en ongesonde omstandighede aangehou word.
Met ’n hoflasbrief in die hand het die NDBV se spesiale eenheid, saam met inspekteurs van die plaaslike DBV, die eiendom besoek. Daar is bevind dat verskeie honde in vuil, onvoldoende hokke aangehou word en dat hul algemene versorging nie aan minimum welsynsvereistes voldoen nie.
Volgens die NDBV het sommige van die diere ou wonde en letsels gehad wat verdere veeartsenykundige ondersoeke nodig gemaak het. Twee honde is aanvanklik uit Sheik se sorg geneem weens hul swak fisieke toestand, waarna strafregtelike klagte teen hom gelê is.
Opvolgbesoeke het getoon dat die situasie nie wesenlik verbeter het nie, en nog honde is later verwyder. Die NDBV het aangevoer dat die beskuldigde genoeg tyd gehad het om die omstandighede reg te stel, maar dat daar nie voldoende verbetering was nie.
Die hof het Sheik ’n boete van R3 000 of drie maande tronkstraf opgelê, wat vir vyf jaar opgeskort is op voorwaarde dat hy nie weer skuldig bevind word aan soortgelyke oortredings nie.
Die NDBV meen die uitspraak bevestig dat klagtes oor dieremishandeling ernstig opgeneem word en dat oortreders aanspreeklik gehou sal word om die welsyn van diere te beskerm.