Met hul helder vere en slim maniertjies steel ringnekpapegaaie gou die hart van voëlliefhebbers — maar dié tropiese parkiete hou ’n donkerder kant. Volgens die Papegaaitelersvereniging van Suidelike-Afrika (PVSA) word hulle al meer as ’n dekade lank as ’n indringerspesie beskou weens hul impak op inheemse voëls en ekosisteme.
Studies wys dat ringnekpapegaaie aggressief met plaaslike spesies meeding, nesplekke oorneem en selfs ander voëls tydens broeiseisoen aanval. Hulle versprei boonop siektes en ontwrig die natuurlike balans van ekosisteme.
Oorspronklik uit Afrika en Indië, het ontsnapte troeteldiere in Suid-Afrika gevestigde populasies gevorm — veral in stede soos Durban, Johannesburg en Kaapstad. Plaaslike waarnemings dui daarop dat daar reeds meer as 2 000 individue in Durban alleen is, met getalle wat landwyd vinnig toeneem.
Kenners waarsku dat die gebrek aan gekoördineerde beheermaatreëls die probleem laat vererger. Die PVSA beklemtoon daarom die noodsaak van permitte ingevolge die Wet op Nasionale Omgewingsbestuur: Biodiversiteit. Die voëls word as ’n Kategorie 2-indringerspesie geklassifiseer, wat beteken hulle mag slegs met toestemming en onder streng voorwaardes aangehou of geteel word.
Guy van Zyl van die PVSA sê: “Dit is nie bloot ‘n formaliteit nie — dit word ingevolge die Wet op Nasionale Omgewingbestuur: Biodiversiteit vereis.Hulle mag wel aangehou en geteel word, maar slegs met die toepaslike toestemming en onder streng voorwaardes.”