MONTREAL – Mense wat ophou rook, verminder wel die skade aan hul longe, maar nuwe navorsing dui daarop dat sommige veranderinge moontlik blywend is en kan help verklaar waarom voormalige rokers steeds ‘n groter risiko vir rookverwante siektes het.
Navorsers aan die McGill-universiteit in Montreal het bevind dat sekere longselle ná rookstaking herstel, terwyl ander langdurige veranderinge toon wat verband hou met die struktuur van longweefsel, die immuunstelsel en die gesondheid van bloedvate.
Die studie is in die vaktydskrif Translational Research gepubliseer.
Volgens prof. Carolyn Baglole van McGill se Departement Farmakologie en Terapie toon die navorsing dat sommige skade omkeerbaar is, maar dat ander veranderinge lank ná rookstaking voortduur.
“Ons bevindinge help verduidelik waarom voormalige rokers steeds ‘n groter risiko vir rookverwante siektes het. Hoewel sommige longselle herstel nadat iemand ophou rook, bly ander veranderinge jare lank voortbestaan,” sê sy.
Rokers het ‘n groter risiko om longkanker en chroniese obstruktiewe longsiekte (KOLS) te ontwikkel. Hoewel die risiko afneem wanneer iemand ophou rook, bly voormalige rokers se risiko steeds hoër as dié van mense wat nog nooit gerook het nie.
Vir die studie het navorsers ‘n meta-ontleding gedoen van openbare data oor meer as 100 000 longselle afkomstig van nege mense wat nog nooit gerook het nie, sewe voormalige rokers en vyf aktiewe rokers.
Die ontleding het molekulêre aktiwiteit in meer as 40 verskillende soorte longselle ondersoek om vas te stel hoe rook die longe beïnvloed en hoe hulle ná rookstaking herstel.
Die navorsers het bevind dat sommige voormalige rokers unieke molekulêre patrone ontwikkel wat nie by huidige rokers of mense wat nog nooit gerook het nie, voorkom. Volgens die navorsers kan dit daarop dui dat rookstaking ‘n eie biologiese handtekening in die longe agterlaat.
Nicole Heimbach, ‘n doktorale student en medeskrywer van die studie, sê die navorsing is ‘n belangrike stap om vas te stel watter rookskade kan herstel en watter moontlik permanent is.
Volgens Baglole wil die navorsers vervolgens vasstel waarom sommige longselle nie ten volle herstel nadat iemand ophou rook nie. Sy sê ‘n beter begrip van dié prosesse kan nuwe maniere moontlik maak om longherstel te bevorder en die risiko van rookverwante siektes verder te verminder.